گەشتی یەک ڕۆژە | گەشتێک بۆ گوندی سەرگەت و گوندی دەرەی مەڕ لە خورماڵ.
لە ڕۆژێکی هاوین و گەرمی مانگی ٨ بریارماندا گەشتێک بکەین بۆ خورماڵ و بە دیاریکراوی گوندی سەرگەت و گوندە چۆڵکراوەکەی دەرەی مەڕ.
گەشتەکەمان لەگەڵ نوسینگەی گەشتیاری کوردستان ئاوتدۆر دەستی پێکرد، بەرێکەوتین بۆ خورماڵ و لەوێ وەستاین بۆ نانی بەیانی، و پاشان بەڕێکەوتین بۆ گوندی سەرگەت.
بۆ گەیشتن بە ئەشکەوتەکان و و گوندی دەرەی مەڕ، لە ناو گوندی سەرگەت وەستاین و لەوێوە بە پێ بەڕێکەوتین، بە درێژایی ڕێگاکە بە ناو تونێلی دار و نزیک ئاو و کانی رێمان کرد، تا گەیشتینە ئەشکەوتی یەکەم، و هەر لەو نزیکانە جۆگەلەیەکی ئاوی سارد بە لاماندا خوڕەی دەهات، لەوێ شتەکانمان داناو و بەڕێکەوتین بەرەو خانوە ئەشکەوتیەکان، رێگاکامان بۆ دەرەی مەڕ کەمێک سەخت تر و گەرمتر بوو، بەڵام لە کۆتاییا گەیشتینە جێ.
گوندی دەرەی مەڕ بە نزیکەی 10کم لە سەنتەری خورماڵ دورەو و دەکەوێتە دامێنی زنجیرە شاخەکانی سورێن، ئەم گوندە تا ئێستا هیچ مێژوویی نووسراوی نیە، بەڵام بە پێی گێڕانەوەکان، مێژوەکەی دەگەڕێتەوە بۆ 1400 پێش ئێستا.
دەرە بە واتای چەند و مەڕ بە واتای ئەشکەوت، ناوی گوندەکە بە کوردی سۆرانی دەبێتە چەند ئەشکەوت، لەم گوندە ژمارەیەکی زۆر ئەشکەوت هەیە کە هەندێکیان سروشتین و بەشێکیشیان دەسکردن، لە زۆربەی ئەشکەوتەکان مەڕ و ماڵات بەخێوکراون و هەندێ کاتیش بۆ پارێزگاری لە ساردی زستان و باوبۆران و یاخو شەڕ خەڵکی گوندەکە لە ناو ئەشکەوتەکان ژیاون.
وەکو باس دەکرێت گوندەکە تا ساڵانی 2003 ئاوەدان بووە و خەڵک لێی نیشتەجێ بوون، بەڵام پێش ئەوە و لە ساڵانی 1979 گوندنشینانی دەرەی مەڕ گوازراونەتەوە بۆ ئۆردوگاکانی خورماڵ و لە 1991 وەک یەکەم گوندی ناوچەکە ئاوەدان کراوەتەوە و وەکو پەناگەیەک بەکارهاتووە بۆ خۆ حەشاردان و خەباتکردن بۆ شۆرشی کوردی.
لێرەوە ئێمە بە ناو گوندەکەدا گەڕاین و پاشان بەرەو ئەشکەوتی یەکەم بەڕێکەوتینەوە، لەوێ ژەمێکمان خوارد و بەرەو خورماڵ گەڕاینەوە و لەوێ یەکیک لە خۆشترین دۆندرماکانمان خوارد کە بە شیری مانگا دروست دەکرێت.
لە کۆتاییدا ئەمەوێت بلێم، تکایە لە کاتی گەشتکردن ژینگەی چواردەورتان پارێزن، تا دەتوانن کەلوپەلی پلاستیکی بەکارمەهێنن و پاشەرۆکانتان بەجێماهێڵن.
لەگەڵ وێنەکان بەجێتان دەهێڵم